Tema 5: As programacións didácticas vixentes – DIARIO

Se tivese que destacar un apartado deste tema sería sen dúbida a avaliación; concretamente as aclaracións que vimos sobre os criterios de avaliación e os estándares de aprendizaxe. Son uns conceptos que nos ensinaron na materia de deseño curricular pero que causaron confusión no noso grupo á hora de elaborar as nosas unidades didácticas. Como xa mencionei no dosier deste tema, vimos este vídeo, que explica moi ben o proceso de avaliación nos centros de Educación Primaria e Secundaria a partir da LOMCE; explícao dunha maneira moi comprensible, deixando claro o que significa cada un dos conceptos implicados, incluíndo os criterios de avaliación e os estándares de aprendizaxe.

Os criterios de avaliación defínense mediante unha serie de verbos en infinitivo e cada un refírese a unha capacidade que ten o alumnado. Aquí tedes dous exemplos que se poden atopar no currículo de terceiro da ESO para a materia Primeira Lingua Estranxeira:

B1.1. Coñecer e saber aplicar as estratexias máis adecuadas para a comprensión do       sentido xeral,     a información esencial, os puntos e as ideas principais, ou os detalles relevantes do texto.

B1.2. Identificar información xeral e específica relevante de textos sinxelos emitidos cara a cara ou por medios audiovisuais sobre temas concretos e coñecidos (información básica sobre algunha materia do currículo, temas do seu interese ou ocupacionais propios da súa idade e do seu nivel escolar), pronunciadas con lentitude e claridade.

Pertencen os dous ao bloque de comprensión de textos orais e describen coñecementos que o alumnado debe coñecer e saber aplicar. Neste caso, refírense ás habilidades de comprender o sentido xeral dun texto oral e de ser capaz de identificar os conceptos máis relevantes. Son unhas habilidades (ou uns criterios) que o docente ten que medir cos estándares de aprendizaxe. Os estándares son observables e permítennos medir e graduar as habilidades que se describen nos criterios de avaliación. Aquí tedes dous exemplos do mesmo bloque:

PLEB1.3. Entende o esencial do que se lle di en transaccións e xestións cotiás e estruturadas (por exemplo, en hoteis, tendas, albergues, restaurantes, e centros de lecer, de estudos ou de traballo).

PLEB1.4. Identifica o sentido xeral e os puntos principais dunha conversa formal ou informal entre dúas ou máis persoas interlocutoras que ten lugar na súa presenza, cando o tema lle resulte coñecido e o discurso está articulado con claridade, a velocidade media e nunha variedade estándar da lingua.

Describen as habilidades que acabamos de ver dun xeito máis específico para poder “medilas”. Como docentes, teríamos que avaliar cada un dos estándares do currículo, utilizando instrumentos de avaliación coma exames escritos, proxectos ou a observación. Unha vez avaliados todos os estándares, que nos permiten definir os resultados da aprendizaxe, obteriamos as cualificacións do alumnado. Deste xeito podemos determinar si se alcanzaron os obxectivos didácticos e as competencias clave propostas.

En conclusión, nas sesións do tema cinco aprendemos  diferentes contidos sobre as programacións didácticas pero tamén aclaramos algúns conceptos que son fundamentáis á hora de elaborar unidades didácticas. Son coñecementos que nos van a resultar moi útiles no noso futuro como docentes.