Temas 7 e 8 - Dosier

Nesta entrada imos ver as actividades que fixemos na última sesión da asignatura. Empezámola rematando o tema 6, cun debate piramidal. Foi sobre a conexión no ensino das diferentes linguas en secundaria (o castelán, o galego e as dúas linguas estranxeiras). Coordinábanse os docentes destas materias para non repetir demasiados contidos ou actividades? Comunicábanse polo menos? O debate rematou rapidamente, chegando á conclusión de que nos institutos aos que asistimos non había ningún tipo de coordinación entre os docentes destas materias. A verdade é que nunca pensei no útil que podería ser a cooperación entre os docentes de linguas. Pode ser útil para reducir contidos repetitivos, e incluso para ensinar certos elementos que poden facilitar a aprendizaxe de varias das linguas impartidas.

A segunda actividade fixémola coa técnica do Puzzle de Aronson. Dividímonos en grupos e cada un deles elixiu unha unidade dun libro de texto. Cada membro do grupo pasaba a ser o “experto” nunha das seccións do libro (como vocabulario, gramática, expresión e comprensión oral ou lectora) e analizaba os exercicios desa parte en concreto. Unha vez analizadas todas as partes das unidades, os grupos tiveron uns minutos para comentar o que viron. Despois, xuntáronse os expertos de cada apartado (os de gramática de cada grupo, os de vocabulario, etc.) e comentaron o que encontraron nas súas unidades. Por último, xuntáronse os grupos orixináis para facer as conclusións finais. É unha técnica bastante interesante. Converte aos alumnos nos titores dos seus compañeiros e fomenta o traballo en equipo; como os membros son interdependentes e cada un ten a súa función, non hai alumnos que se desentenden mentras o resto do equipo fai todo o traballo.

No tempo restante tamén houbo unha dinámica de “alumnos titores”. Vimos a teoría dos temas 7 e 8 a través das presentacións que preparou a clase. Presentacións nas que vimos diferentes metodoloxías, e sistemas educativos de varios países. Foi unha forma efectiva de aprender os contidos restantes no pouco tempo que nos quedaba de clase. Foron presentacións cortas e dinámicas que foron capaces de manter as nosas atencións. Comentarei os aspectos que me pareceron máis interesantes no diario correspondente a estes temas.

A última actividade fixémola na casa individualmente. Consistiu en elixir dúas metodoloxías, informarnos sobre elas e deseñar unha actividade para cada unha delas. Publicarei unha entrada coa miña actividade nos próximos días.